الشط التانى

الشط التانى
بينى وبين الشط التانى سنين
بالرغم إنى شيفه على بعد يومين
نزلت أعوم
لاقيت الناس جواه بالخوف مشنوقة
وشفت صبية
بتكحل عنيها السود
بلون الدم النازل
من فوق جبنها المعصوم
بشوك الورد
ولاقيت الفرح سجين
سجانه الهم
حاطت قدامه صنية
فيها الغم
بيتغمس بطعم الذل
ولما يخلص ف الآخر
بيقربع كاس المر
كاس المر المليان
من بحر خطايا الشيطان
وشفت دموع غرقانة
ف بحور النار
بتمصمص ف شفايف
بكرة المتغطى بالعتمة
وبترقص مع قلب الآه المسموعة
فوق جتت الناس
وقالت لىّ أرجع يا ضناية
حاسب تنداس
وساعتها خفت من الكلمة
ورجعت مكانى من تانى
وعرفت إن البحر غريق ملهوش آخر
وإن الشط التانى بعيد